លោក កឹម សុខា បញ្ជាក់ជំហរម្តងទៀតថា កុំឱ្យយកឈ្មោះលោកទៅពាក់ព័ន្ធនឹងការបង្កើតគណបក្ស ឬចលនានយោបាយក្រៅប្រទេសណាមួយ

0
208

(ភ្នំពេញ)៖ លោក កឹម សុខា អតីតប្រធានគណបក្សសង្រ្គោះជាតិ ដែលកំពុងជាប់បំរាមតុលាការ នៅថ្ងៃទី០៤ ខែកញ្ញា ឆ្នាំ២០២១នេះបានប្រកាសជំហរជាថ្មី ដល់សាធារណជន ដើម្បីកុំឱ្យយកឈ្មោះលោកទៅពាក់ព័ន្ធនឹងការបង្កើតគណបក្ស ឬចលនានយោបាយណាមួយ ខណៈកន្លងមកលោកបានប្រកាសចំៗថា លោកមិនពាក់ព័ន្ធ មិនគាំទ្រ និងមិនចូលរួមក្នុងគ្រោងការបង្កើតរដ្ឋាភិបាលក្រៅប្រទេស ដែលប្រកាសដោយមេឧទ្ទាមក្រៅច្បាប់ សម រង្ស៉ី នោះទេ។

តាមរយៈ Facebook នៅព្រឹកទី០៥ ខែកញ្ញា ឆ្នាំ២០២១នេះ លោក កឹម សុខា បានសរសេរយ៉ាងដូច្នេះថា «ដោយសង្កេតឃើញថា មានបុគ្គល ក្រុមគណបក្ស ឬ ចលនានយោបាយខ្លះនៅតែយកឈ្មោះ និង រូបភាពខ្ញុំទៅភ្ជាប់ពាក់ព័ន្ធជាមួយនឹងសកម្មភាពដើម្បីបម្រើផលប្រយោជន៍ និង មហិច្ឆិតារបស់ពួកគេ ដូច្នេះខ្ញុំសូមបញ្ជាក់ជូន សាធារណជនឲ្យបានជ្រាបថា សេចក្តីថ្លែងការណ៍ ឬសេចក្តីប្រកាសរបស់សហមេធាវី ដែលជាតំណាងស្របច្បាប់របស់ខ្ញុំកន្លងមក គឺធ្វើក្នុងនាមខ្ញុំ និងជាឆន្ទៈរបស់ខ្ញុំ»។

នៅក្នុងសេចក្តីប្រកាសរបស់សហមេធាវី លោក កឹម សុខា កាលពីថ្ងៃទី០៧ ខែកុម្ភៈ ឆ្នាំ២០២១ បានបញ្ជាក់ដូច្នេះថា៖ «ក្នុងនាមឯកឧត្តម កឹម សុខា យើងខ្ញុំជាសហមេធាវី សូមបញ្ជាក់ជាថ្មីម្តងទៀតថា៖ បុគ្គល ឬក្រុមណាដែលមានបំណងបង្កើត ឬបានកំពុងបង្កើត ឬបានបង្កើតគណបក្ស នយោបាយ ឬចលនានយោបាយណាមួយ សូមកុំយកករណី ឬឈ្មោះរបស់ឯកឧត្តម កឹម សុខា ទៅភ្ជាប់ពាក់ព័ន្ធជាមួយ។ បុគ្គល ឬក្រុមណាដែលធ្វើកិច្ចការខាងលើ សូមមានសេចក្តីក្លាហាន ទទួលខុសត្រូវ ដោយខ្លួនឯង»។

កាលពីថ្ងៃទី០៧ ខែសីហា ឆ្នាំ២០២១កន្លងទៅលោក ចាន់ ចេន សហមេធាវីលោក កឹម សុខា បានសរសេរប្រកាសនៅលើ Facebook យ៉ាងដូច្នេះថា «ក្នុងនាមខ្ញុំជាមេធាវី និងជាសហការីរបស់ឯកឧត្តម កឹម សុខា ខ្ញុំសូមបញ្ជាក់ជូនសាធារណជនឲ្យបានជ្រាបថា ឯកឧត្តម កឹម សុខា មិនពាក់ព័ន្ធ មិនគាំទ្រ និងមិនចូលរួមក្នុងការគ្រោង និងការបង្កើតរដ្ឋាភិបាលក្រៅប្រទេស ដែលប្រកាសដោយលោក សម រង្សី កាលពីពេលថ្មីៗនេះទេ។ ជាពិសេស ឯកឧត្តម កឹម សុខា ក៏មិនអនុញ្ញាតឲ្យយកឈ្មោះគាត់ទៅប្រើប្រាស់ និងភ្ជាប់ជាមួយនោះឡើយ»។

ការប្រកាសរបស់ លោក កឹម សុខា បានធ្វើឡើងបន្ទាប់ពីសមាជិកជាន់ខ្ពស់ នៃអតីតគណបក្សសង្រ្គោះជាតិ ជាបន្តបន្ទាប់បានស្នើសុំសិទ្ធិធ្វើនយោបាយឡើងវិញ និងបង្កើតគណបក្សនយោបាយ។ យ៉ាងហោចណាស់មានគណបក្សចំនួន៣ ដែលគេដឹងថា កំពុងរៀបចំបង្កើតឡើងដោយអតីតគណបក្សសង្រ្គោះជាតិនាពេលនេះ ក្នុងនោះមានគណបក្សកែទម្រង់កម្ពុជា លោក អ៊ូ ច័ន្ទរ័ត្ន, គណបក្សកម្ពុជានិយម របស់លោក យ៉ែម បុញ្ញឫទ្ធិ និងគណបក្សបេះដូងជាតិជាដើម៕

LEAVE A REPLY

Please enter your comment!
Please enter your name here